I 2010 er det 150 år sidan Årdal blei eigen kommune. Denne boka fortel om kampar for å sikra lokalsamfunnet sine interesser gjennom desse åra, om årdølene sine politiske krefter, og om korleis kunnskap har prega utviklinga av industrisamfunnet. På 1800-talet handla politikken om å stå på eigne bein. Ny kyrkje blei bygd. Skulane trong nye hus. Mange årdøler blei deltakarar i demokratiske prosessar gjennom det lokale sjølvstyret. Nytida i Årdal kom med utbygginga av Tyinvassdraget tidleg på 1900-talet. Bruken av vasskraft til industrielle føremål i lokalsamfunnet blei ei hovudsak for kommunen - ei sak som enno er aktuell. Rundt fabrikkane voks det fram eit levande samfunn, og Årdal kommune blei ein garantist for gode velferdstilbod.
