Når is og snø smeltar, kjem stadig nye funn til syne
Tafjordfjella – Indre Sunnmøre og fjellheimen austanfor – er eit av dei største og mest villmarksprega fjellområda i Sør-Noreg, og blant dei første områda som vart isfrie etter siste istid. Dette er tidlegare enn ein lenge har trudd, og inneber at nettopp her kan ein finne spor etter noko av den tidlegaste menneskelege aktiviteten i dei norske høgfjella.
Til no har arkeologar registrert meir enn tre tusen kulturminne her, som bogestillingar, fangstgraver og buplassar. Særleg oppsiktsvekkjande er dei mange bogestillingane, som tyder på at jegerar har levd her og jakta på villrein alt i steinalderen. Kven var menneska som ferdast her? Kva kan desse spora fortelje oss?
I denne boka tek Runar Hole og Astor Furseth oss med til Tafjordfjella. Vi får vite om både dei spektakulære funna og om funn som kanskje ikkje gir meining ved første blikk. Saman med lokalkjende og fagfolk dokumenterer forfattarane dei ulike jaktområda i tekst og bilete. Kan desse nye funna endre måten vi forstår fortida på?
Runar Hole er arkeolog med fangsthistorie som fagfelt, medan Astor Furseth er lokalhistorikar og forfattar.
