Liv og dikt

Då Johannes K. Herleiksplass gjekk bort i 2008 fann etterkommerane mange etterlatne skrifter i ei kiste på loftet. Han skreiv dagbok frå 1927-1933 og vi får innblikk i korleis det var å vera barn og ungdom i Skurdalen på denne tida. Frå 1933 til 1945 er det den vaksne og reflekterte mannen som skriv om arbeid og fritid i skuggen av krigen. Gjennom heile perioden var han lyrikar og etterlot seg om lag 80 dikt. I kista var det også ei samling av både romanar og faglitteratur. Både Duun og Vesaas var representert. Så kven var Johannes Herleiksplass? Anleggsarbeidaren frå Skurdalen, som dreiv med jakt og fiske, men som også hadde ei litterær og poetisk interesse som få kjente til.