Mot straumen - Firda Seafood gjennom 40 år

Gjennom fire tiår har Firda utvikla seg frå eit sjølvbygd settefiskanlegg til eit fullintegrert havbrukskonsern. I 2023 var konsernet for første gong den største privateigde skatteytaren blant bedrifter i Sogn og Fjordane. Gjennom heile denne epoken har Ola Braanaas vore eigar og pådrivar for vekst og nysatsingar. Undervegs har han hatt med seg mange gode hjelparar, trufaste medarbeidarar og støttespelarar frå næringsliv, politikk og kulturliv. Sjølv om verksemda har vakse og levert gode resultat, har motbakkane vore lange og utfordringane nervepirrande. Fleire gongar har heile livsverket hengt i ein tynn tråd.

Dette er historia om å gå i gang med to tomme hender, og ta måla ein har sett seg på alvor. Historia om å satse når andre kastar korta, og å handle når andre berre snakkar. Om å stadig motivere seg sjølv på ny, og å aldri kvile på laurbæra.