Time historielag - årbok 2026

Årbok for Time historielag 2026 er den 14. i rekkja. Boka er på 178 sider, rikt illustrert og inneheld 21 artiklar av 14 ulike forfattarar.
To av bidraga merkar seg ut som nybrotsarbeid. Øystein Hetland, forfattar av boka «Ei forbanna plikt» om norsk politi under krigen, har skrive om lensmennene på Jæren og dei vanskelege moralske dilemma dei stod i. Jan Serigstad har teke for seg arbeidaridrettslaga på Jæren i mellomkrigstida, eit emne som det til nå er skrive lite om.
Årboka set også søkelyset på kva den raske veksten i Time får å seia for bygningsvernet i kommunen. Med historisk dokumentasjon, intervju og foto av nye og gamle Bryne viser Anne Berit Hatlem korleis byen på Jæren har endra seg.
Elles er fleire artiklar vigde til markante personar frå Time, mellom andre dei tidlege forretningsmennene Carl Reiarson Norheim og Betuel Herigstad, og læraren, bonden og kunstnarvertinna Serena Seland.
Redaktør: Tom Hetland