Djup stølssameige er ei stølsgrend i fjellet mellom Hol og Hemsedal, om lag fem mil frå Ål sentrum. Det er seks stølar som utgjer sameiga Djup. Det er Dusegard, Søre Ton, Holto, Myljo-Ton, Skogly og Bergton. To av stølene driv med sau og/eller ammekyr, og dei andre stølene vert nytta som fritidsbustader. I boka, som Magne Haugen har forfatta og redigert, får me vite meir om slektene til gardene som har hatt og har støl i Djup. Eit kapittel er vigd til samferdselshistorie. Vidare kan me lesa om dagligliv på stølen, om buføring, matauk og sosialt samvær. Eit kapittel tek for seg reguleringa av Stolsvassdraget, eit handlar om forvaltinga av jakt- og fiskerettar i sameiga. Kulturminne har fått eit eige kapittel, til slutt kjem det eit par songtekstar. Det er ei god blanding av eldre og nyare bilete, dei eldste er om lag 100 år gamle. Alt i alt ei svært interessant og leseverdig bok som ein ikkje treng vera lokalkjent for å ha utbytte av.
