I denne boka har me i anledning femtiårsjubileet for at gymnaset vart sjølvstendig forsøkt å samle historia om skulen og vegen dit. Då gymnasklassane tok til for over femti år sidan var det ei fortsetjing av nybrotsarbeidet som var gjort før, som arbeidet for å få både realskule og yrkesskule til Kvinnherad.
Ikkje minst var skulen viktig som den første storskulen som tok i mot elevar frå heile kommunen og blei ein smeltedigel for ungdomar frå både indre- og ytre luten, frå industrien, frå gardane, frå bedehusa og frå basarholmen.
Ei samlande kraft og møteplass for ungdomar frå heile kommunen-der bygdedyret blei lagt att ved døra. Sidan den gong har fleire tusen elevar teke utdanninga si ved Kvinnherad vidaregåande skule, og ein kan sjå tilbake på ei lang historie om ein skule som ikkje berre har vore læringsarena, men og eit treffpunkt, ein samlingsplass og ein smeltedigel for ungdomar frå ein langstrakt kommune i ein halv mannsalder.
