Rett etter 1900 hadde nesten 13.000 hallingar reist til USA og Canada.
I flokkar reiste dei frå eit Norge i vekst til det lova landet på andre sida av Atlanterhavet det gjekk gjetord om. Éi felles drivkraft hadde dei: Draumen om eit betre liv. Mange realiserte den amerikanske draumen i ulike former, og nokre vart både nasjonale kjendisar og dollarmillionærar. Andre igjen opplevde tragediar og gjekk til grunne.
Her er mellom anna den unike reisedagboka til Gro Gudmundsrud, historia om Ingebjørg Viko som levde som mann, ungguten Asle Oscar som avslørte røvarbanden til Jesse James og Ole Jordheim som vart multimillionær på brød. Paradislandet Amerika er historia om kvifor dei reiste, om den lange reisa over havet og korleis det gjekk med dei.
