Skogsdrift med tømmerhogst, brøtning, tømmerfløyting og trelasthandel var i lange periodar den viktigaste næringa i landet, og var med på å danne det økonomiske fundamentet for Noreg som sjølvstendig nasjon. I boka Brøtningsdammane - kulturhistoriske monument i Drammensvassdraget skriv Torodd Lybeck om brøtningsdammar som står att i dag, og om omfanget av dammar i Drammensvassdraget. Han beskriv skilnaden på brøtning og fløyting, og han forklarer kva funksjon brøtningsdammane hadde i samband med tømmerfløyting på 1700-, 1800- og 1900-talet.
Boka tek for seg om lag 150 gamle brøtningsdammar i elver og vassdrag som fører vatn gjennom Randsfjorden, Sperillen og Krøderen, sideelver som møtest i Tyrifjorden ved starten på Drammenselva, og sideelver ned til Skotselv i Øvre Eiker.
