Før i tida vart ølet brygga på gardane - svakt øl til tørstedrikk, sterkare øl til høgtid og fest. I heile Trøndelag var øl frå gammalt av sentralt i samkommer og lag, både ved dei årlege høgtidene og ved merkedagane i livet. Til oppbevaring og frakt, og som drikkekar for øl, var tre det mest vanlege materialet. Drikkestellet for øl er prestisjefylte gjenstandar som oftast har dekorative detaljar i både utforming og overflatedekor.
Gjenstandane som blir presenterte i denne boka, er henta frå ei omfattande registrering gjort i Trøndelag i åra 2008-2010. Boka er delt inn i tre hovudkapittel: bryggekar, skjenkekar og drikkekar. Eit eige kapittel er vigd ølbrygginga slik at den kunnskapen òg blir teken vare på. Boka skal vera til inspirasjon blant anna for handverkarar som ønskjer å skapa nye produkt med rot i den gamle kulturen. På same tid er ho ei flott fagbok til nytte og glede for alle som er interessert i øltradisjonane våre.
