Kinn og Kinnaspelet

Kinn, ytst mot storhavet i Sunnfjord, ein halvtimes båtreise frå Florø, har tre store attraksjonar: fjellformasjonen Kinnaklova, den gamle Kinnakyrkja i stein, og Kinnaspelet, eit av dei mest tradisjonsrike sogespel i landet. - Kinnaklova er eit av dei mest markante seglingsmerka på norskekysten. - Kinnakyrkja, bygd på 1100-talet, har historia si knytt til Sunnivalegenda, og har mykje felles med helgenstaden på Selja, litt lenger nord på kysten. - Kinnaspelet "Songen ved det store djup" er framført årvisst sidan 1985, og har samla eit publikum på kring 90 000 på friluftsscena innunder fjellet, med himmel og hav som kulissar. Denne boka fortel historia om Kinn, Kinnakyrkja og Kinnaspelet, og er også ein vegvisar i landskapet på den særmerkte øya. Rikt illustrert med foto og kart.