Silhuettar - eit portrett av modisten Kirsti Nordberg Moe

Modistfaget er i dag eit av dei minste, men levande handverksfaga i Noreg. For tretti år sidan var det i ferd med å forsvinna frå læreplanen, då det gjekk tiår utan at det vart avlagt noko sveineprøve. Ein ny giv kom på byrjinga av 1990-talet. Kirsti Nordberg Moe var den første lærlingen på 30 år i faget. I dag underviser ho skuleklassar, har hospitantar og sit i faggruppa som utarbeider læreplanar i faget. Kirsti Nordberg Moe har sidan 1990 leigd atelier i krambua på Sunnhordland Museum på Stord. Her lagar ho hattar og kunstobjekt til hovudet, som blir lagt merke til langt ut over regionen sine grenser. To av hennar modellar har blant anna motteke merket for God Design av Norsk Designråd.