Strand mållag og Ryfylkemuseet har saman laga ei bok med lokal folkemusikk som m.a. kan nyttast i skule og barnehage. Boka bygger på fleire periodar med innsamlingsarbeid i Strand kommune, der alt det innsamla stoffet er lagra på Ryfylkemuseet i Folkemusikkarkivet for Rogaland. Det siste innsamlingsarbeidet, som har vore direkte knytt til arbeidet med boka, har særleg vore retta mot slike småstubbar som har vore sunge for borna og vidareførte frå generasjon til generasjon. Boka innheld difor mange slike barnesongar. I tillegg vil de finne stev og viser av ulike slag og endatil ein feleslått. Eit eige kapittel innheld eldre og nyare gåter. Notenedteikningane er gjort av Ruth Anne Moen etter opptak. I tillegg er det tatt med nokre avskrifter frå Holger Barkved og Olav Sande sine notesamlingar. Dei fleste tekstane er skrive ned på dialekt, nært opp til slik informantane syng. Alle som kjøper boka, får ein cd i gåve der Silje Vige syng alle songane, slik at dei skal vere lettare å lære.
