Margrethes kokebok

Det er året 1826.

Margrethe Schjødt Mørch Parelius, 24 år gammal, dotter på handelsstaden Hopsjøen på Hitra, skal gifte seg om eit års tid. No gjer ho seg klar for ei ny rolle i livet sitt. Snart skal ho styre eige hus og heim, bli husmor og ta ansvar for mat og kleda, for alle store og små gjeremål som ei 1800-tals kvinne må klare ut med. Tida er inne.

Så kva gjer ho? Ho finn fram ei skinninnbunde lita bok og fyller dei blanke sidene med oppskrifter, som ho gjennom sitt unge liv har samla og tatt vare på. Det meste handlar om mat og matlaging, men også om farging av garn og tøy og hjelperåd av ulike slag.

To hundre år seinare kjem Margrethe sine oppskrifter for første gong i trykt utgåve og er dermed gjort tilgjengelig for alle.