Dette er andre boka av Robert Bly gjendikta av Odd Goksøyr.
Forrige, «Den natta Abraham ropte til stjernene» fekk svært god omtale. «Ei gjendiktingsbragd» kalla Knut Ødegård (Vårt Land) boka, og for Bly-gjendiktaren Helge Torvund var ho ei av dei tre beste frå bokhausten (Dagbladet).
Som i den første boka tek Bly utgangspunkt i ei gammal persisk diktform, henta frå persisk og arabisk tradisjon, ghazalen, og gjennom denne driv Bly sin djupt alvorlege leik med historie og kunst, mytar og religion, liv og død. Enno tydelegare enn i den første samlinga stig også mennesket Robert Bly fram, den aldrande poeten med eit forsonande og til tider muntert blikk på den naturlege døden, men også med glimt av den gamle anti-krigspoeten sin skarpe brodd.
Boka har eit personleg etterord av Øyvind Vågnes
om eit møte med Robert Bly.
