Dikt i utval

Jan-Magnus Bruheim (1914 - 1988) frå Skjåk i Gudbrandsdalen debuterte i 1941 med diktsamlinga Stengd dør. Han gav ut 45 bøker, mest lyrikk og barnebøker, men også prosabøker. Dette utvalet inneheld dikt frå alle lyrikksamlingane, i tillegg til eit utval av barnedikta. Boka har også fleire artiklar og mange flotte bilete.

BREVET
Eg sit i kveld og skriv til deg
og kjenner orda spire.
Men enno står det berre eitt
og lyser på papiret.

Eit
kjære
berre, står det her.
Eg må vel finne fleire?
Men vide flakkar tankane,
som fuglar kringom reiret.

Det er så mangt eg skulle sagt -
Fortenkt eg sit ved bordet
og tenkjer: kanskje er det nok
med dette eine ordet.

Eg ynskjer deg - kvarhelst du bur
langt burte eller nære,
at du kan kjenne varmen frå
det vesle ordet: Kjære