Orfeus i Warszawa er ei diktbok som gir oss rystande innblikk i krigens gru i eit hærtatt Polen, og som samtidig rommar mange av dei vakraste kjærleiksdikta som finst i polsk poesi. Krzysztof Kamil Baczy.ski (1921-1944) var ein ung kunstinteressert poet som blei kasta inn i krigens brutale røyndom då tyske nazistar okkuperte Polen i 1939. Baczy.ski blei soldat i Heimearmèen og deltok i mange væpna aksjonar. I 1942 gifta han seg med si høgt elska Barbara («Basia»), som blei målet for hans mange kjærleiksdikt. Begge to deltok i det heltemodige Warszawaopprøret mot okkupanthæren, som braut ut i august 1944. Opprøret enda på tragisk vis også for det unge ekteparet, som begge blei drepne av den tyske krigsmakta.
Baczy.skis mange etterlatne motstands- og kjærleiksdikt representerer eit strålande kapittel i polsk poesi.
Dette framstår som ei diktsamling som vil gjera den norske omsettingslitteraturen rikare. Eg nøler ikkje med å kalle det stor dikting. (Edvard Hoem)
