Debutromanen til Anna Gavalda. Eg elska ho er ein roman om skilsmisse og einsemd. Men det er like mykje ein roman om den verkeleg gode samtalen, og om samhald og støtte. For fjorten dagar sidan var Chloé framleis ei godt tilfreds kone og mor. Så pakka Adrien kofferten og drog til elskerinna si. Og Chloé sit igjen med eit liv ho meiner ligg i ruinar, og dei to små døtrene ho og Adrien har saman. Fordi ho er ulykkeleg, bestemmer svigerfaren seg for å ta henne med på landet. Fordi ho ikkje vil ete, bestemmer han seg for å lage mat til henne. Fordi ho ikkje sluttar å gråte, går han i kjellaren etter ei flaske god vin. Det blir seint og tid for oppbrot. Men dei blir sitjande. Han begynner å snakke. For første gong fortel han nokon om seg sjølv, om livet sitt, om ho han ikkje kunne få.
